كلام يزعل

عبقرية لم الفلوس

10:41 ص

إيهاب محروس , 0 Comments

من يشاهد إعلانات التلفزيون حول الضرائب والإقرار الضريبي يشهد بجمال الإعلانات وعبقرية إخراجها
ولكني أتسائل ألا يوجد لدي الحكومة أي عبقرية أخري ؟؟
غير عبقرية لم الفلوس

وفي الواقع لم أذهب بعيداً فالحكومة لديها عبقريات أخري مثل تبديد الفلوس

فهم عباقرة في لمها وصرفها فيما لا طائل من ورائه

لمن تسن القوانين

6:08 م

إيهاب محروس , 0 Comments

خبر غريب سمعته إنه رفعوا رسوم إجراءات المحاكم ، وهذا يعني إن اللي عايز يدور علي حقه هيغرم قبل ما يجي حقه ، ويا حقه يجي يا ميجيش ، يعني لو لك 100000 جنيه علي حد وبيماطل وبيتهرب هتحاول تروح تشتكيه وتقاضيه هتدفع 7500 جنيه وقتي عشان تقاضيه وإحنا عارفين إن المحاكم حبالها طويلة

خلاصة العبارة عايزين يقولوا ما حدش يدور علي حقه كله سنة وانتوا طيبين ويجعله عامر
عامر عامر عامر عامر
ياواد يا عامر أنت لسه بتلعب بره ألعب براحتك وكسر ما يحدش هايدور علي حاجة

أبصق له في شربته

10:23 ص

إيهاب محروس , 0 Comments

في هذه الأيام تركب القطار
تجد كام مهندس من دول مخرج اللاب توب من شنطته ومشغل فيلم يتفرج عليه
أو تجد واحد تاني مشغلك الموبايل علي أغاني وبصوت عالي مزعج
بل مزعج جداً
بل ساعات تلاقي مثل هذه المناظر في الميكروباص
وممكن في التاكسي كمان
فلقد مرت بي مثل هذه المواقف في القطار والميكروباص والتاكسي

هذه المواقف فكرتني بمشهد كنت أراه من أكثر من 25 سنة أو أكثر إذ كنت وانا صغير أسافر مع أبي فأجد عسكري الجيش حاطط راديو علي أذنه ومشغل أغاني عبد الحليم أ وشادية أو ماتش كورة
مرت علي الأمة أكثر من 30 سنة
وتقدمت دول وقامت صناعات والدنيا إتغيرت وإحنا كل اللي عملناه بدلنا الراديو الصغير بموبايل ولسه بنسمع أغاني لأ وبنزعج اللي حوالينا

أنا هنا مش هاتكلم علي أن الموسيقي حرام
بل أنا عايز أتكلم علي حقوق الناس العامة في المواصلات وغيرها
هب أنك تظن مثلا إن الغناء ليس به شيئ
عليك ألا تؤذي أحداً بما تسمع
بل إني أري ذلك حتي في القرآن إذا أردت أن تسمع قرآن ضع سماعة في أذنك واسمع ما شئت
فمابالك بالاغاني

طيب نعمل إيه مع الجماعة دول

في حكمة بسيطة بتقول إبصق له في شربته

يعني إيه لا تجعله يهنأ بفعل هو به مخالف للشرع مخالف لقواعد المجتمع والآداب العامة

مرة حدث هذا الموقف قلت بأسلوب مؤدب الصوت لو سمحتوا يأخونا
ولا حد عبرني

أخذت اتحدث مع من بجواري بصوت مسموع للي مشغل الاغاني بصوت عالي وقلت له

الواحد من دول يشتري موبايل ب50 أو 100 جنيه ويجي يقرفنا به

طبعا صاحبنا دمه اتحرق لأنه كان بيتمنظر وأنا بصقت في شوربته
بوظت عليه المنظرة وأحرجته
وهكذا لا تجعل أحداً يرتكب الخطأ وينجو بفعلته ويهنأ بها
إجعله لا يهنأ بما يفعل

العجيب انك ممكن تقول لواحد بصوت مرتفع إخفض الكاسيت أو صوت الموبايل يقولك طيب قول بصوت واطي أي انه ينكر عليك إنك زعقت له في حين هو مصدعنا ولا حاسس

الحكومة المصرية والخطط المهلبية

8:49 ص

إيهاب محروس , 0 Comments

الحكومة المصرية والخطط المهلبية
من كام يوم سمعت خير اللهم إجلعه خير
البطاقات الرقم القومي اللي دوخونا علي ماعملناها
لازم تجدد كل بضع سنوات
طبعا عشان تقف طابور تاني وتدفع تاني وتخليك تاني ما نتش فايق لحاجه تاني

أقول تاني

والعجيب ان الحكومة عايزة تجدد بيانات 80 مليون آدمي كل بضع سنوات في حين ان رئيس الدولة لم تتغير بياناته من 30 سنه ، المفروض هذا اللي يتغير بياناته كل بضع سنوات مش كده ولا إيه ؟؟؟؟؟؟

قنوات الحلل وبرامج المحشي

6:57 م

إيهاب محروس , 1 Comment

أصبحت ظاهرة في مجموعة من القنوات الفضائية
ولكن ظاهرة تزعل جداً
كل ما تقلب تجيب قناة تلاقيها عاملة عروض حلل
إعلانات حلل

وطبعاً لا تعلن القنوات عن حلل إلا لإن معظم برامجها غير الإعلانات محشي
وبالتالي تأتي فقرة الإعلانات حلل عشان تكمل الطبخة

والعجيبة إن الحلل اللي بيبيعوها حلل وحشة كمان
وهنا بيطرأ سؤال كثير محيرني
طيب برامج المحشي هنطبخها في إيه لما تكون الحلل وحشة

رحلتي الفكرية من مدينة نصر للعباسية

1:29 م

إيهاب محروس , 1 Comment

رحلتي الفكرية

من مدينة نصر إلي العباسية

احترت كثيرا في العنوان
والحكاية ببساطة إني أردت الذهاب إلي رمسيس يوم الخميس الماضي
وطبعا إحنا عارفين المواصلات بتبقي فاضية خالص
المهم كنت عايز ألحق القطار 931 كالعادة
و931 بيتحرك في الساعة 8:10 مساءا
ولكي استطيع أن الحق هذا القطار بنزل من المكتب الساعة 6 مساءا إحتياطي أحسن المواصلات تبقي زحمة ولا حاجة

أما الخميس المنصرم فكانت هناك حكاية أخري
تعالوا نشوف حصلي إيه الخميس الماضي

وقفت انتظر أي وسيلة مواصلات تقلني إلي رمسيس
تمر عليك حافلة تلو أخري فثالثة ولاتجدها إلا ممتلأة هما جابوا الناس دي كلها منين مش عارف

وطال الانتظار للحافلة الموعودة التي تقلني لألحق بالقطار
حتي إذا استبد بي القلق سمعت أحد ينادي
رمسيس رمسيس !!!!
لأ طبعا
كان بينادي نادي السكة نادي السكة
قلت أهو أي خطوتين والسلام ومن هناك أكيد إن شاء الله هلاقي أي حاجة تذهب بي إلي رمسيس
المهم ركبت
طبعا السيد المحترم رئيس مجلس الميكروباص طلب أجره one pound
جنيه نعم لحلوح من بتوع زمان إيام العز لما كان الجنيه لا تراه الناس إلا في الاحلام

ركبت ونزلت عند نادي السكة
وعند نادي السكة إن حد يقول رمسيس أبدا
حتي أخذت الظنون تأخذني هل هناك شيئ سيء هناك في رمسيس
ومش عارف الناس من بعد ماشالوا رمسيس من الميدان والناس بتستخف بيه ليه
آه راحت هبته بعدما اتنقل من ميدانه
وكنت بتسائل إيام لما شالوه من مكانه طيب ياربي هما شالوه ليه من الميدان
وكان خطر لي إنهم هيحطوا إبنه مكانه
المهم

بعد فترة من الزمان
طبعا وأنت بنتظر الوقت بيلعب معاك لعبته

سمعت حد بيقول العباسية
قلت وماله ياخوي هو ده فيه حاجه غلط
عباسية عباسية
أهي أحسن من العيشة ديه

ركبت العباسية
وسألت السيد وزير الميكروباص
الأجرة كام قال نصف لحلوح
نصف جنيه
بحاله

دفعت طبعا أنتم عارفين كل وزير ميكروباص بيحدد التعريفة اللي تناسبه وفقا لاختصاصه

هل ممكن نلاقي من العباسية حاجة تأخذ الهاي واي ونروح مباشرة إلي رمسيس آه يارمسيس يا أخوي
ده اللي ها نعرفه حالا

وأنا في العباسية
طبعا مشيت مسافة صغيرة لحد ما اروح لمكان اركب منه
وهناك بعد فترة سمعت غمرة غمرة
ركبت طبعا ماأنتم عارفين لكي تعبر عبر ثلاث أو أربع قارات من مدينة نصر لحد رمسيس لازم تغير الركوبة

ركبت لحد غمرة بنصف لحوح
ومن غمرة لرمسيس بنصف لحلوح

من غمرة لرمسيس كان جو ثان من الرحلة
إذ قرب النهاية بتحكم القفشة وتتسارع الاحداث

السيد وزير الميكروباص، الناس بتعطي له الاجره فضه
وقال احد الزبائن (قصدي السائحين في هذه الرحلة عابرة القارات الاربع – مدينة نصر – نادي السكة – العباسية – رمسيس )
تصدق إن واحد أعطاني عشرة جنيه فضة
فرد عليه السائق وقال طيب أنا واحد أعطاني 30 جنيه فضة
عندها لم أتمالك نفسي من الضحك وقلت لهم
أعطوني كيس النقود
هل هذا ما أرادت الحكومة الموقرة فعله لتنشيط الاقتصاد ومعالجة الأزمة المالية
وهي أن يحمل الناس معهم بعد ذلك كيس للنقود

علي العموم هذا أحسن من الفيزا اللي خربت بيوت الامريكان
وبرضه هذا تصرف حكيم
لأن اللي هينسي كيس النقود بتاعه في البيت مش هيشتري حاجه وبالتالي يدخر ويوفر ويتحسن دخل الفرد

وطبعا انا لا ألوم السادة وزراء الميكروباص ورؤساء مجلس إدارتها في سياستهم لزيادة دخلهم
وتحسن الاقتصاد بدل ما تركب مواصلة واحدة وتدفع لحلوح مصري وربع تدفع 2جنيه ونصف في اربع مواصلات لخط واحد
فإنها سياسة حكيمة طبعا

وفكرني ذلك بأن هذا ما تفعله الحكومة طوال الوقت لتحسين مواردها
ألم يفعل ذلك السيد الدكتور أحمد نظيف حين كان وزيرا للاتصالات
بعد ما كان المواطن المصري بيدفع فاتورة تليفون واحدة كل سنة باشتراك واحد
صار يدفع 4 فواتير باربع اشتراكات
وطبعا كلما شركة المصرية للاتصالات تحب تزود أرباحها ترفع التعريفة
بالضبط زي سائق الميكروباص

عفارم عفارم
اهو ده الكلام التمام لتحسين الاقتصاد
طبعا واحد هيقول ياعم كنت ركبت تاكسي وريحت نفسك
شايفك وهرد عليك بس في وقت تاني
نتكلم عن السادة رؤساء التاكسي

مع الاعتذار للدكتور المسيري رحمه الله فالعنوان شطره مقتبس من كتابه الرائع